21 красавіка Папа Францішак павіншаваў юдэйскую супольнасць Рыма са святам Песах — галоўным юдэйскім святам, якое адзначаецца ў памяць аб зыходзе ізраільскага народу з егіпецкага палону.

Святкаванне сёлета пачнецца 22 красавіка і па традыцыі будзе працягвацца восем дзён.

Свае віншаванні Пантыфік скіраваў на імя галоўнага рабіна Рыма Рыкарда Дзі Сэньі.

«З абноўленай удзячнасцю ўзгадваючы аб нашай сустрэчы, якая адбылася 17 студзеня, калі я быў сардэчна прыняты Вамі і юдэйскай супольнасцю ў Вялікай сінагозе, хачу выказаць самыя шчырыя віншаванні з нагоды свята Песах», — распачаў сваю віншавальную прамову Пантыфік.

«Яно нагадвае, што Усемагутны Бог вызваліў свой умілаваны народ з рабства і прывёў у абяцаную зямлю. Няхай Ён вас суправаджае таксама і сёння праз дастатак у сваіх благаслаўленнях, бароніць вашу супольнасць і ў сваёй міласэрнасці адорыць кожнага супакоем», — дадаў Святы Айцец.

Папа папрасіў маліцца за яго, а таксама запэўніў у сваёй малітве. «Няхай Пан дазволіць нам усё больш узрастаць у сяброўстве», — напісаў Пантыфік напрыканцы віншавальнай тэлеграмы.

Паводле беларускай рэдакцыі Ватыканскага радыё,

(MV)