7 мая Папа Францішак прыняў на аўдыенцыі ў Ватыкане Прэзідэнта Швейцарыі Ёхана Шнайдэра-Амана. Затым палітык сустрэўся з сакратаром па адносінах Апостальскай Сталіцы з дзяржавамі арцыбіскупам Полам Галахерам.

Сардэчныя перамовы сталі нагодай, каб адзначыць існаванне добрых адносін паміж Святым Пасадам і Швейцарыяй, а таксама выказаць удзячнасць за вернае і прафесійнае служэнне корпуса Папскай швейцарскай гвардыі. Быў высока ацэнены станоўчы ўклад Касцёла ў розныя сферы жыцця швейцарскага грамадства, у атмасферы спакойнага супрацоўніцтва. Звярталася ўвага на пытанне прафесійнай падрыхтоўкі моладзі, якая адыгрывае значную ролю ў яе ўваходзе ў сферу працы.

Падчас сустрэчы абмяркоўвалася тэма міграцыі і палітыкі гасціннасці і інтэграцыі ў актуальным еўрапейскім кантэксце. Гаворка ішла таксама пра канфлікты на Блізкім Усходзе і сітуацыю паўночнаафрыканскіх краін. Была падкрэслена патрэба ва ўмацаванні намаганняў на карысць бяспекі і міру.

Паводле беларускай рэдакцыі Ватыканскага радыё

(AG)