Езус вучыць шляху служэння, але часта ў Касцёле людзі шукаюць улады, грошай і марнасці, заўважыў Папа Францішак 17 мая падчас ранішняй Эўхарыстыі ў Ватыкане. У гаміліі Пантыфік адзначыў існаванне кар’ерыстаў, гатовых знішчыць іншага, каб узняцца.

Каментуючы літургічнае евангельскае чытанне (Мк 9, 30-37), Папа Францішак нагадаў, што Езус вучыў сваіх вучняў шляху служэння, але яны разважалі паміж сабою, хто большы. «Езус кажа мовай прыніжэння, смерці, адкуплення, а яны — мовай кар’ерыстаў: у каго будзе большая ўлада», — заўважыў Папа.
 
Папа дадаў, што вучні паддаваліся спакусе ментальнасці гэтага веку. Па словах Пантыфіка, на шляху, які паказвае Езус, правілам з’яўляецца служэнне іншым, а не пыха, улада і грошы. Святы Айцец адзначыў, што таксама і сёння ў Касцёле існуе спакуса празмерных амбіцый, здзяйснення кар’еры і валодання грашыма.

Кіравацца ўладай, нянавісцю, зайздрасцю, якія знішчаюць іншых людзей, — небяспечна; гэтая з’ява, аднак, прысутнічае і ў Касцёле і праяўляецца ў паклёпах і ачарненні іншых людзей, сказаў Папа.

«Вялікія святыя казалі, што адчуваюць сябе вялікімі грэшнікамі, бо зразумелі дух гэтага веку, які быў у іх, і мелі мноства спакусаў да марнасці. Ніхто з нас не можа сказаць: я не з’яўляюся чалавекам ад гэтага веку, я — чысты, бо мы ўсе сустракаемся са спакусай знішчэння іншага, каб узыйсці наверх. Гэта спакушэнне марнасцю, якая дзеліць і знішчае Касцёл. Гэта не дух Езуса», — падкрэсліў Пантыфік і заклікаў вернікаў памятаць, што любоў да духа гэтага свету варожая Богу.

Паводле беларускай рэдакцыі Ватыканскага радыё, (AYU)