4 чэрвеня Папам Францішкам быў выдадзены дакумент у форме «Motu proprio» «Come una madre amorevole» («Як любячая маці»). Такім чынам Пантыфік пажадаў узмацніць прыхільнасць Касцёла да абароны непаўналетніх.

Як вынікае з дакумента, біскупы, якія нядбайна ставяцца да высвятлення выпадкаў сексуальнага насілля над дзецьмі, будуць вызваляцца ад пасады. У дакуменце Папа адзначае, што сярод «сур’ёзных прычын», якія вядуць да вызвалення біскупа ад пасады, прысутнічае марудлівасць у ажыццяўленні паўнамоцтваў, у прыватнасці, як кажа дакумент «Sacramentorum Sanctitatis Tutela» Яна Паўла, у дачыненні да спраў, звязаных з сексуальным насіллем у адносінах да непаўналетніх і да дарослых з абмежаванымі магчымасцямі.

Тэкст дакумента падзелены на пяць артыкулаў. У ім гаворыцца, што кампетэнтная дыкастэрыя Рымскай курыі, калі атрымае сур’ёзныя доказы, павінна пачаць расследаванне, якое можа прывесці да дэкрэту аб вызваленні іерарха ад пасады. Канчатковае рашэнне, аднак, заўсёды прымае Папа.

Паводле беларускай рэдакцыі Ватыканскага радыё