Каб не згубіцца на шляху веры, хрысціяне маюць каштоўны «навігатар» — евангельскія благаслаўленні, сказаў Папа Францішак 6 чэрвеня падчас ранішняй Эўхарыстыі ў Ватыкане.

Па словах Святога Айца, ігнараванне гэтых указанняў вядзе да слізкага шляху ідалапаклонства: эгаізму, славалюбства і любові да грошай. Каментуючы евангельскае «Нагорнае казанне» (Мц 5, 1-12), Пантыфік заўважыў, што Езус вучыў «новаму закону», не адмяняючы «старога», а толькі «ўдасканальваючы яго».

«Гэтым законам з’яўляецца тое, што мы называем “благаслаўленнямі”. Гэта новы закон Пана для нас. Гэта праваднік, маршрут, “навігатар” хрысціянскага жыцця. Менавіта ідучы гэтым шляхам, следуючы ўказанням гэтага навігатара, мы можам развівацца ў нашым хрысціянскім жыцці», — сказаў Папа.

Святы Айцец заўважыў, што пасля аналагічнага апавядання пра благаслаўленні ў Евангеллі паводле Лукі гаворыцца пра «гора» багатым, сытым, тым, хто цяпер смяецца, пра каго добра кажуць людзі (пар. Лк 6, 20-26).

Пантыфік падкрэсліў, што самі па сабе багацці з’яўляюцца дабром, але прывязанасць да іх вядзе да ідалапаклонства. Як благаслаўленні вядуць да паўнаты жыцця, так пакланенне багаццям, марнасць і эгаізм вядуць да згубы.

«Калі прывязаваемся да багаццяў, не патрабуем нікога і нічога. Калі паддаемся марнасці, становімся як фарысей, які нават у малітве хваліў самога сябе, а не Бога. Пыха і празмерны смех, які закрывае сэрца, таксама з’яўляюцца небяспечнымі», — лічыць Папа Францішак.

Сярод ўсіх благаслаўленняў Пантыфік вылучыў ключавое  — пакору. Прыгадваючы словы Хрыста: «Вучыцеся ад Мяне, бо Я ціхі і пакорны сэрцам», Святы Айцец падкрэсліў, што менавіта пакора найбольш набліжае да Езуса.

Паводле беларускай рэдакцыі Ватыканскага радыё,

(MV)