Папа Францішак стварыў «працоўную групу» для вызначэння асноўных пытанняў адносна тлумачэння і прымянення на практыцы прынцыпаў рэформы «сужэнскага працэсу», уведзенай Апостальскім лістом «Mitis Iudex Dominus Iesus» з 15 жніўня 2015 г.

 

Яе каардынатарам будзе генеральны сакратар Канферэнцыі Біскупаў Італіі біскуп Нунцыо Галанціна. 

 

У сваім лісце да вышэйзгаданага іерарха Пантыфік спаслаўся на свой удзел у нядаўнім пасяджэнні італьянскага епіскапату, на якім гучала шмат пытанняў адносна новых нормаў, звязаных са сцвярджэннем несапраўднасці сужэнства, ад працэсуальных варыянтаў у працы дыяцэзіяльных і міждыяцэзіяльных судовых структур да адміністрацыйных, арганізацыйных і фінансавых нюансаў падчас разгляду касцёльнымі судамі сужэнскіх спраў.

 

Пантыфік падзякаваў прэфекту Найвышэйшага Трыбуналу Апостальскай Сігнатуры, дэкану Трыбуналу Рымскай Роты і старшыні Папскай рады па інтэрпрэтацыі заканадаўчых тэкстаў за дапамогу, якую яны прапанавалі генеральнаму сакратару італьянскага епіскапату для выканання ім «каардынацыйнага служэння».

 

Беларуская рэдакцыя Ватыканскага радыё