На працягу летніх месяцаў Папа Францішак не будзе цэлебраваць традыцыйныя ранішнія св. Імшы з вернікамі ў капліцы ватыканскага Дома св. Марты — месцы, ў якім пражывае.

Апошняя перад летнімі канікуламі Эўхарыстыя прайшла тут раніцай 20 чэрвеня. Правядзенне святых Імшаў будзе адноўлена 8 верасня.

Ранішняя літургія, якую Папа Рымскі амаль штодзённа цэлебруе ў прысутнасці невялікай групы вернікаў, стала адным з новаўвядзенняў яго пантыфікату.

Падчас яе Святы Айцец як пробашч звяртаецца да прысутных са сваёй гаміліяй, падрыхтоўкай якой займаецца пры першых промнях сонца, пасля малітвы і чытання літургічных тэкстаў.

Запрошаныя на Эўхарыстыю асобы прыбываюць згодна са спецыяльным графікам, групамі па 40-50 чалавек. Напачатку пантыфікату гэта былі супрацоўнікі ватыканскіх структур, а затым вернікі з рымскіх парафій, бо Папа Францішак з’яўляецца таксама біскупам Рыма.

Паводле беларускай рэдакцыі Ватыканскага радыё,

(MV)