Меркаванае забойства студэнта з ЗША ў Рыме глыбока кранула Папу Францішка. 6 ліпеня Пантыфік сустрэўся з бацькамі 19-гадовага Бо Саламона, які два дні таму быў знойдзены мёртвым у рацэ Тыбр.

Такім чынам Папа хацеў выказаць сям’і сваё спачуванне і запэўніць у малітве, паведаміў кіраўнік Прэс-службы Святога Пасаду а. Фэдэрыко Ламбардзі.

Следчыя мяркуюць, што малады чалавек стаў ахвярай злачынства. Ён паступіў на летнія курсы ў амерыканскі прыватны Універсітэт імя Джона Кабота ў Рыме. У першы вечар пасля прыбыцця хлопец знік. Гэта было ў мінулы чацвер. У панядзелак яго цела было знойдзена на беразе недалёка ад аднаго з мастоў праз Тыбр, у пяці кіламетрах ад універсітэта ўніз па цячэнню ракі.

Паводле беларускай рэдакцыі Ватыканскага радыё