Як сказана ў спецыяльным паведамленні, апублікаваным 2 жніўня Залай Друку Апостальскай Сталіцы, такое рашэнне Пантыфік прыняў пасля доўгай малітвы і разважання.

У склад новай Камісіі ўвайшлі 13 чалавек, шэсць з якіх — жанчыны. Вывучыць важнае і складанае пытанне жаночага дыяканату Папа даверыў святарам, кансэкраваным асобам, тэолагам, рэктарам вышэйшых навучальных устаноў і ўніверсітэцкім выкладчыкам з Іспаніі, Італіі, Германіі, Аўстрыі і ЗША. Узначаліў Камісію арцыбіскуп Луіс Франсіско Ладарыё Ферэр, сакратар Кангрэгацыі Веравучэння.

Пытанне аб допуску жанчын да дыяканату на ўзор старажытнага Касцёла было скіравана да Святога Айца 12 мая 2016 г. у Ватыкане падчас аўдыенцыя для больш чым 800 манахінь, якія ўдзельнічалі ў пасяджэнні Міжнароднага аб’яднання генеральных настаяцельніц манаскіх супольнасцяў.

Папа адзначыў тады, што роля так званых дыяканэс у раннім хрысціянстве не зусім зразумелая. «Я спытаюся ў Кангрэгацыі Веравучэння, ці былі праведзены даследаванні па гэтым пытанні, і даручу заснаваць афіцыйную камісію для яго вывучэння. Думаю, што Касцёл толькі выйграе ад высвятлення гэтага пытання», — сказаў тады Святы Айцец.

Паводле беларускай рэдакцыі Ватыканскага радыё