31 ліпеня Папа Францішак прызначыў новага Апостальскага адміністратара «ad nutum Sanctae Sedis» для Апостальскай адміністратуры ў Кыргызстане. Ім стаў езуіт айцец Янэз Міхельчыч, суперыёр рэзідэнцыі Таварыства Езуса ў Бішкеку.

Святар змяніў на гэтай пасадзе біскупа Мікалая Месмера, памерлага 18 ліпеня.

Айцец Янэз Міхельчыч родам са Славеніі. Працуе ў Бішкеку з 1992 г., дзе выкладае замежныя мовы ў дзяржаўным універсітэце. З 2001 г. кіруе мясцовай супольнасцю езуітаў.

Адзіным каталіцкім храмам у Кіргізіі з’яўляецца касцёл св. Міхала Арханёла, пабудаваны ў 1969 г. мясцовай супольнасцю немцаў, якія эмігрыравалі ў Цэнтральную Азію пасля загаду Сталіна выслаць іх з Паволжа разам з палякамі, літоўцамі і карэйцамі.

У Кіргізіі шмат гадоў працуюць айцы з Таварыства Езуса. Мясцовая Апостальская адміністратура, заснаваная 18 сакавіка 2006 г. Бэнэдыктам XVI, ахоплівае ўсю тэрыторыю Кіргізскай Рэспублікі і складаецца з трох парафій са звязанымі з імі 20 капліцамі.

Паводле беларускай рэдакцыі Ватыканскага радыё