Малітвай за хрысціян Блізкага Усходу разам з супольнасцю Халдэйскай Каталіцкай Царквы Папа Францішак завяршыў першы дзень свайго падарожжа ў Грузію.

Малітва прайшла вечарам 30 верасня ў тбіліскай халдэйскай царкве св. Сымона Персідскага. Тут Пантыфіка прывітаў Патрыярх Вавілоніі арцыбіскуп Луіс Рафаэль І Сако, які прыбыў з Багдада разам з некаторымі іншымі іерархамі — удзельнікамі Сінода Халдэйскай Каталіцкай Царквы. У малітве прынялі ўдзел каля 300 чалавек, сярод якіх былі як мясцовыя вернікі, так і хрысціяне з Ірака і Сірыі.

У сваёй малітве Папа прасіў Езуса аб перамозе над зацвярдзеласцю сэрцаў «нявольнікаў нянавісці і эгаізму», аб знікненні культуры смерці і трыумфе жыцця.

«Пане Езу, з’яднай свой крыж з пакутамі шматлікіх нявінных ахвяр: дзяцей, старых, хрысціян, якія падвяргаюцца пераследу; атулі сваім пасхальным святлом глыбока параненых: людзей, якія падвяргаюцца злоўжыванням, пазбаўленых свабоды і годнасці; дазволь адчуць трываласць Твайго Валадарства тым, хто жыве ў няўпэўненасці: сасланым, бежанцам, згубіўшым смак жыцця», — казаў Папа.

Святы Айцец заклікаў, каб народы, якія знаходзяцца ў стане вайны, навучыліся шляхам прымірэння, дыялогу і прабачэння, і ўдзяліў прысутным благаслаўленне.

Паводле беларускай рэдакцыі Ватыканскага радыё

(AG)