З адмысловым заклікам Папа Францішак звярнуўся 23 кастрычніка пасля малітвы “Анёл Панскі” на плошчы св. Пятра ў Ватыкане.

“У гэтыя драматычныя гадзіны я блізкі да ўсяго насельніцтва Ірака, асабліва горада Масул. Нашы душы шакаваны жудаснымі актамі насілля, якія ўжо на працягу доўгага часу здзяйсняюцца супраць нявінных грамадзян, як мусульман, так і хрысціян, а таксама тых, хто належаць да іншых народнасцяў і рэлігій. Я быў засмучаны навінамі аб абыякавым забойстве шматлікіх сыноў гэтай умілаванай зямлі, сярод якіх было мноства дзяцей. Гэтая лютасць прымушае плакаць, пакідаючы нас без словаў. Слова “салідарнасць” суправаджае абяцанне майго ўспаміну ў малітве аб тым, каб цяжка спакутаваны Ірак быў моцным і трывалым у надзеі на імкненне да будучыні бяспекі, прымірэння і супакою”, - сказаў Папа.

Буйная вайсковая аперацыя па вызваленні горада Масул ад тэрарыстаў “Ісламскай дзяржавы” пачалася 17 кастрычніка. Яе праводзіць іракская армія пры падтрымцы кааліцыі заходніх дзяржаў. 22 кастрычніка стала вядома, што баевікі пакаралі смерцю на паўднёвай ускраіне горада каля 300 чалавек, сярод якіх былі дзеці.

Паводле беларускай рэдакцыі Ватыканскага радыё

(AG)