Святы Айцец прыняў на аўдыенцыі 14 лістапада членаў зборнай каманды Германіі па футболе. Чэмпіёны свету прыбылі ў Рым з нагоды таварыскага матчу са зборнай Італіі. Сустрэча з Пантыфікам прайшла ў Апостальскім палацы.

У сваім кароткім прывітанні Папа прызнаўся, што чуў аб камандным духу нямецкай зборнай, як сакрэце яе перамогаў.

«Таму слова “Mannschaft” стала агульнаўжыванай назвай вашай каманды. Сапраўды, спорт патрабуе не толькі строгай дысцыпліны і асабістай самаахвярнасці, але і павагі да бліжняга і каманднага духу. Гэта вядзе вас да поспеху як “Mannschaft”, і ў той жа час, да прызнання адказнасці, якая выходзіць за межы футбольнага поля, асабліва ў адносінах да моладзі, якая часта бярэ з вас прыклад», — сказаў Папа.

Святы Айцец падзякаваў зборнай Германіі за падтрымку шматлікіх дабрачынных і сацыяльна важных ініцыятыў, сярод якіх праект Sternsinger (у бел.перакладзе - калядаўшчыкі), накіраваны на дапамогу дзецям з бедных краін.

«Гэта ініцыятыва дэманструе, наколькі разам магчыма пераўзыйсці бар’еры, якія здаюцца непераадольнымі і абцяжарваюць жыццё найбольш патрабуючых і абяздоленых людзей. Таксама і такім чынам вы спрыяеце будаванню больш справядлівага і салідарнага грамадства», — падкрэсліў Папа.

На заканчэнне аўдыенцыі Пантыфік пажадаў нямецкім спартсменам поспехаў у іх спартыўнай і сацыяльнай дзейнасці і папрасіў маліцца за яго.

У сустрэчы з Пантыфікам прынялі ўдзел усе члены нямецкай зборнай, у тым ліку і вызнаўцы ісламу. У якасці падарунка ад нямецкай каманды Папа Рымскі атрымаў трыко футбольнай зборнай з аўтографамі яе членаў.

Паводле беларускай рэдакцыі Ватыканскага радыё (IL)