Пантыфік нагадаў, што «Еўропа, якая выйшла са стагоддзя дзвюх сусветных войнаў і крушэння вялікіх ідэалогій», шукае ўласную ідэнтычнасць, але для стварэння сапраўднага адзінства патрэбны не толькі палітычныя, эканамічныя і юрыдычныя інструменты — безумоўна важныя, — але таксама этычнае і духоўнае аднаўленне на аснове хрысціянскіх каранёў. «Аднаўленне Еўропы не магчыма без Бога», — лічыць Святы Айцец.

Бэнэдыкт XVI узгадаў пра апекуна свайго пантыфікату і Настаўніка Касцёла — святога Бэнэдыкта, які жыў у VI стагоддзі — у эпоху найцяжэйшага геапалітычнага крызісу, што выбухнуў пасля падзення Рымскай імперыі. Менавіта дзякуючы апоры на хрысціянскае вучэнне нарадзілася тады рэальнасць, якая сёння называецца Еўропай. «Няхай жа святы Бэнэдыкт надалей будзе настаўнікам, у школе якога мы будзем вучыцца мастацтву жыцця і сапраўднаму гуманізму», — заклікаў Святы Айцец.