Поўны адпуст у Год святога Паўла

Святы Айцец

13.05.2008 19:00

28 чэрвеня 2008 г. у Каталіцкім Касцёле распачнецца Год святога Паўла. 10 мая 2008 г. ватыканскі трыбунал Апостальскага Пенітэнцыярыя абвясціў пра магчымасць атрымаць поўнае адпушчэнне кары за грахі ва ўрачыстасць святых Апосталаў Пятра і Паўла (29 чэрвеня), а ў базыліцы святога Паўла за Мурамі, якая была пабудавана над труною Апостала Народаў, можна будзе атрымаць поўнае адпушчэнне кары за грахі на працягу ўсяго года. Ва ўсіх мясцовых Касцёлах таксама можна будзе атрымаць поўны адпуст, прымаючы ўдзел у публічных набажэнствах у гонар святога Паўла ў першы і ў апошні дзень юбілейнага года. Мясцовымі біскупамі будуць вызначаны дні, калі можна будзе атрымаць поўны адпуст у святынях, якія носяць тытул святога Паўла, а таксама ў іншых месцах, вызначаных ардынарыем. Год святога Паўла, абвешчаны з нагоды 2000-й гадавіны з дня нараджэння Апостала, распачнецца 28 чэрвеня г. г. вечарам, а завершыцца 29 чэрвеня 2009 г. Поўны адпуст, які вернік можа ахвяраваць у сваёй інтэнцыі або за душы памерлых, удзяляецца на звычайных умовах: сакрамэнтальная споведзь, Эўхарыстычная Камунія і малітва ў інтэнцыях Святога Айца. Адпушчэнне караў за грахі ў Год святога Паўла могуць таксама атрымаць асобы, якія не ў стане выканаць усе абавязковыя для гэтага ўмовы з-за хваробы або па іншых матываваных і важных прычынах. Яны павінны прыняць пастанову споўніць гэтыя ўмовы, як толькі гэта будзе магчыма, і далучыцца духоўна да пэўнага набажэнства ў гонар святога Паўла, ахвяруючы Богу свае малітвы і цярпенні ў інтэнцыі еднасці хрысціянаў. Паводле матэрыялаў інфармацыйных агенцтваў