Папа Бэнэдыкт XVI уручыў палій Мітрапаліту Кандрусевічу |
Святы Айцец |
29.06.2008 18:20 |
На знак лучнасці са Святым Айцом Мітрапаліт Мінска-Магілёўскі арцыбіскуп Тадэвуш Кандрусевіч прыняў сёння ў базыліцы святога Пятра ў Рыме з рук Бэнэдыкта XVI палій. Разам з ім стужкі з белай авечай воўны атрымалі 40 прызначаных на працягу апошняга года мітрапалітаў. Папа Бэнэдыкт XVI узначаліў урачыстую Літургію ў бызыліцы святога Пятра, якую канцэлебравалі разам з ім новапрызначаныя мітрапаліты. Ва ўрачыстасці прыняў удзел Канстанцінопальскі Патрыярх Барталамей І. Святы Айцец прамовіў разам з духоўным лідэрам сусветнага праваслаўя ўрачыстую гамілію. Абодва іерархі таксама прамовілі разам Вызнанне веры і ўдзялілі благаслаўленне. Ва ўрачыстасці прымалі ўдзел каля ста пілігрымаў з Беларусі, якія радаснымі воклічамі прывіталі Папу, калі той ускладаў палій на плечы Мітрапаліта Тадэвуша Кандрусевіча. Палій (лац. pallium) — элемент літургічнага адзення ў выглядзе вузкай стужкі з белай авечай воўны з вышытымі чорнаю воўнаю крыжамі; на канцах — з абшытымі чорным шоўкам кавалачкамі свінца. Насіць палій мае права Святы Айцец (падчас кожнай Літургіі), а таксама адзначаныя асаблівым гонарам іерархі Касцёла (толькі на вялікія святы). Палій Святога Айца сімвалізуе паўнату яго ўлады, палій арцыбіскупаў — паслухмянасць Папе і іх асаблівую блізкасць да Святога Пасаду. Кс. А. Амяльчэня |