Сусветны Патрыярх Канстанцінопальскі Барталамей I выступіў на Сінодзе Біскупаў

Святы Айцец

20.10.2008 19:20

Глыбокую радасць і ўдзячнасць выказаў Бэнэдыкт XVI у адказ на прамову Сусветнага Патрыярха Канстанцінопальскага Барталамея I пасля завяршэння Вячэрні 18 кастрычніка 2008 г. у Сіксцінскай капэле. Упершыню ў гісторыі Сусветнаму Патрыярху была прапанавана магчымасць звярнуцца да Сіноду Біскупаў Рыма-каталіцкай Царквы. Гэты факт падкрэсліў сам Барталамей І: «Мы лічым гэта праяўленнем дзеяння Святога Духа, які накіроўвае нашыя Цэрквы да ўсё больш цесных і глыбокіх узаемных адносінаў, важным крокам да аднаўлення нашага поўнага адзінства». «Расце наша надзея, што настане дзень, калі дзве нашыя Царквы цалкам сыдуцца ў пытаннях пра ролю першынства і сінадальнасці ў жыцці Царквы, якімі займаецца на сучасным этапе наша агульная тэалагічная камісія», — адзначыў Патрыярх. Святы Айцец Бэнэдыкт XVI падзякаваў Патрыярху за багатую і глыбокую прамову, за вялікі хрысціянскі рэалізм, які праявіў выклікі нашага часу: «У гэты момант, — адзначыў Святы Айцец, — мы сапраўды перажылі Сінод». Паводле матэрыялаў catholic.uz