Кардынал Жан-Луі Таран: шансы і межы міжрэлігійнага дыялогу

Святы Айцец

06.01.2009 20:46

Ці магчымы тэалагічны дыялог з мусульманамі? Гэта пытанне ўздымае старшыня Папскай рады па міжрэлігійным дыялогу кардынал Жан-Луі Таран у інтэрв’ю для газеты L’Osservatore Romano. Старшыня ватыканскага ведамства спасылаецца на ліст Святога Айца Бэнэдыкта XVI, які быў змешчаны ва ўступе да кнігі італьянскага сенатара Марчэлла Пэры «Чаму мы павінны лічыць сябе хрысціянамі? (Лібералізм, Еўропа, этыка)». Французскі іерарх прыводзіць дакладную цытату з тэксту Пантыфіка, які звяртаецца да аўтара кнігі: «Вы добра тлумачыце, што дыялог паміж рэлігіямі, у вузкім сэнсе гэтага слова, немагчымы. Аднак вельмі пільным з’яўляецца дыялог паміж культурамі, які паглыбляе культурныя наступствы асноўнай рэлігійнай пазіцыі». Кардынал Жан-Луі Таран звяртае ўвагу на фразу «ў вузкім сэнсе гэтага слова» і падкрэслівае, што Папа выказваецца ў адпаведнасці з дакументам Кангрэгацыі Веравучэння «Dominus Jesus», у якім паказваюцца адрозненні паміж хрысціянскай верай у Бога ў Найсвяцейшай Тройцы і вераваннямі іншых рэлігій. «Такім чынам, тэалагічны дыялог хрысціянаў з іншымі монатэістычнымі рэлігіямі немагчымы, бо яны маюць іншую канцэпцыю Бога. (...) Аднак у той жа час магчымы дыялог з вернікамі іншых рэлігій на такія вельмі рэлігійныя ў сваёй сутнасці тэмы, як стварэнне, жыццё, сям’я, малітва, пост або вечнае жыццё», — падкрэсліў кардынал Жан-Луі Таран, а таксама ўзгадаў словы, якія Бэнэдыкт XVI прамовіў, распачынаючы свой Пантыфікат: неабходна будаваць масты сяброўства з усімі рэлігіямі. Паводле матэрыялаў Ватыканскага радыё