Бэнэдыкт XVI пра сэнс цярпення і моц жыцця

Святы Айцец

03.02.2009 16:18

Паміраючы на крыжы, Езус праз сваю ахвяру і любоў надае сэнс чалавечаму цярпенню. У разважанні падчас нядзельнай малітвы «Анёл Панскі» Бэнэдыкт XVI гаварыў пра сэнс цярпення. Святы Айцец звярнуўся да «месіянскага сакрэту», прадстаўленага ў Евангеллі святога Марка, якое чыталася ў гэтым годзе на нядзельных святых Імшах. Аздараўляючы хворых і выганяючы злых духаў, Езус забараняў ім гаварыць, што Ён — Хрыстус. «Езус адкупіў свет ад граху праз уласную ахвяру на крыжы, а не праз шлях чалавечага трыумфу», — заўважыў Пантыфік. «„Моц жыцця — у цярпенні“ — менавіта гэтую тэму італьянскія біскупы выбралі дэвізам традыцыйнага паслання на Дзень жыцця, — нагадаў Святы Айцец. — Сэрцам я яднаюся з імі і іх словамі, у якіх заключана любоў пастыраў да вернікаў, а таксама адвага гаварыць праўду, адвага абвяшчаць яе дакладна і зразумела, напрыклад, што эўтаназія — гэта ілжывае вырашэнне драмы цярпення, выхад, не годны чалавека. Сапраўдным адказам не можа быць ахвяраванне „салодкай“ смерці, — але сведчанне пра любоў, якая дапамагае змагацца з цярпеннем і агоніяй па-чалавечы. Будзем упэўнены: кожная сляза — і тых, якія пакутуюць, і іх блізкіх, — вядомая Богу». Святы Айцец даверыў Марыі ўсіх церпячых, а таксама тых, хто імі апякуецца, той Марыі, якая раздзяліла балесныя гадзіны мукі і ўкрыжавання свайго Сына. Паводле матэрыялаў Ватыканскага радыё