Бэнэдыкт XVI: прыклад святога Паўла — імпульс да развіцця веры

Святы Айцец

05.02.2009 15:51

«Прыклад і вучэнне святога можа быць імпульсам і нават гарантыяй узмацнення хрысціянскай самасвядомасці кожнага з нас, а таксама амаладжэння ўсяго Касцёла», — адзначыў Бэнэдыкт XVI падчас агульнай аўдыенцыі ў Ватыкане 4 лютага 2009 г. У гэты дзень Святы Айцец завяршыў цыкл катэхезаў, прысвечаных асобе Апостала Народаў. Тэма заключнай катэхезы — «Смерць Апостала Паўла і яго спадчына». Паводле традыцыі Касцёла лічыцца, што мучаніцкую смерць святы Павел прыняў у Рыме. Аднак Новы Запавет не дае апісання гэтага факта. Больш падрабязную інфармацыю знаходзім у рукапісах ранняга хрысціянства. Славутым сведчаннем з’яўляецца ліст біскупа Рымскага Клімента, скіраваны да Касцёла ў Карынце (канец І стагоддзя), у якім апісваецца мучаніцкая смерць святога Паўла. Дакладнае апісанне здарэнняў даецца ў «Дзеях Паўла», напісаных у канцы ІІ стагоддзя. Паводле крыніц, Апостал Народаў, атрымаўшы прысуд ад Нерона, быў забіты мечам у часы пераследу хрысціянаў паміж 64 і 68 гг. у горадзе, які сёння называецца Трэ Фантанэ, што ў перакладзе азначае «тры крыніцы». Апостал быў пахаваны на месцы старога некропаля. У гісторыі хрысціянства святы Павел з’яўляецца выключнай асобай. Пасля сябе Апостал Народаў пакінуў незвычайную спадчыну. Для адных святы Павел быў выдатным місіянерам, настаўнікам мудрасці, містыкам. Для іншых — адступнікам ад Закону, ворагам і паклёпнікам. Ён быў неаспрэчным аўтарытэтам для такіх хрысціянскіх пісьменнікаў, як святы Ян Хрызастом, святы Тамаш Аквінскі і інш. На працягу ўсіх стагоддзяў яго пасланні з’яўляліся прадметам даследавання і навуковых роздумаў. У ХІХ ст. асоба Апостала Народаў, яго вучэнне і заснаваныя Касцёлы становяцца прадметам новых даследаванняў. У Каталіцкім Касцёле місія святога Паўла дала пачатак шматлікім рухам і рэлігійным супольнасцям, якія застаюцца вернымі яго вялікай спадчыне. «Няхай вучэнне вялікага Апостала Народаў, сведчанне яго жыцця дапамагаюць захоўваць хрысціянскую самасвядомасць кожнаму з нас і ўсёй супольнасці Касцёла», — пажадаў Святы Айцец на заканчэнне катэхезы. Паводле матэрыялаў інфармацыйных агенцтваў