Арцыбіскуп Антоніо Вэльё прызначаны старшынёю Папскай рады пастырства эмігрантаў і падарожнікаў

Святы Айцец

03.03.2009 16:11

28 лютага 2009 г. Святы Айцец Бэнэдыкт XVI прызначыў старшынёю Папскай рады пастырства эмігрантаў і падарожнікаў арцыбіскупа Антоніо Марыя Вэльё, які з красавіка 2001 г. займаў пасаду сакратара Кангрэгацыі па справах Усходніх Касцёлаў. Кардынал Рэнато Рафаэле Марціно, які да гэтага часу з’яўляўся старшынёю Папскай рады пастырства эмігрантаў і падарожнікаў, адышоў на пенсію, але захаваў пасаду старшыні Папскай рады «Iustistia et Pax». Сакратаром Папскай рады пастырства эмігрантаў і падарожнікаў па-ранейшаму застаўся арцыбіскуп Агостыно Маркетто. Арцыбіскуп Антоніо Марыя Вэльё нарадзіўся ў 1938 г. у мястэчку Мачэрата Фэльтрыя (Італія). З’яўляецца тытулярным арцыбіскупам Эклано (Італія). Як шматгадовы сакратар Кангрэгацыі па справах Усходніх Касцёлаў ён добра ведаў справы і жыццё Грэка-каталіцкай Царквы ў Беларусі. Адным з апошніх дэкрэтаў, падпісаных ім для БГКЦ, быў дэкрэт № 38/98 ад 3 лютага 2009 г., якім Кангрэгацыя зацвердзіла беларускі тэкст трапара (малітоўны гімн) у гонар благаслаўлёнага кс. Міхала Сапоцькі. Паводле прэс-службы Апостальскага Візітатара для грэка-католікаў Беларусі