Дзяржаўны сакратар Яго Святасці папы Бэнэдыкта XVI кардынал Тарчызіо Бэртонэ стаў кавалерам ланцуга Ордэна Рыцараў Гробу Пана. Гэта самая высокая ступень адзнакі, якая прысвойваецца духоўным і свецкім асобам асаблівага рангу. Цырымонія ўручэння адбылася 15 красавіка 2009 г. у рымскім палацы Della Rovere каля Ватыкана.

Ордэн Рыцараў Гробу Пана ўзнік у Іерусаліме падчас першага крыжовага паходу (1099 г.). Яго членамі першапачаткова з’яўляліся рэгулярныя канонікі, ахоўнікі Гробу Пана.

У 1847 г. рашэннем Апостальскай Сталіцы Ордэн быў адроджаны як таварыства ў асноўным свецкіх асобаў. Галоўная яго мэта — падтрымка хрысціянаў у Святой Зямлі, а таксама Лацінскага Патрыярхату Іерусаліма. Узначальвае Ордэн кардынал Джон Патрык Фоўлі, былы старшыня Папскай рады па сродках масавай камунікацыі. Вялікім прыёрам з’яўляецца Патрыярх Іерусаліма лацінскага абраду (сёння — арцыбіскуп Фуад Туаль).