Бэнэдыкт XVI: «кіберпрастора» можа быць месцам распаўсюджвання культуры пашаны, дыялога і сяброўства

Святы Айцец

20.05.2009 19:34

З нагоды Сусветнага дня сродкаў сацыяльнай камунікацыі, які будзе адзначацца 24 мая 2009 г. пад дэвізам «Новыя тэхналогіі — новыя адносіны. Укараняць культуру пашаны, дыялога і сяброўства», Бэнэдыкт XVI выказаў пажаданне, каб «кіберпрастора» стала месцам стварэння такой культуры. Папа выказаў жаданне, каб «кіберпрастора» стала «месцам распаўсюджвання культуры пашаны, дыялога і сапраўднага сяброўства, якія спрыяюць росквіту каштоўнасцяў праўды, згоды і разумення». Маладых католікаў Бэнэдыкт XVI заклікаў, каб былі «сведкамі веры ў лічбавым свеце». «Выкарыстоўвайце гэтыя новыя тэхналогіі для абвяшчэння Евангелля, каб Добрая Навіна бясконцай любові Бога да кожнай асобы гучала па-новаму ў нашым усё больш тэхналагічным свеце», — падкрэсліў Святы Айцец і заахвоціў, каб усе карыстальнікі новых камунікацыйных тэхналогій выкарыстоўвалі іх патэнцыял для ўмацавання сувязяў сяброўства і салідарнасці, а таксама для будавання лепшага свету.