Апостальская Сталіца рыхтуе новы дакумент, прысвечаны праблемам міграцыі

Святы Айцец

21.05.2009 16:38

Апостальская Сталіца распачала падрыхтоўку новага дакумента, які датычыць праблемаў міграцыі. Папярэдняя ватыканская інструкцыя на гэтую тэму — «Erga migrantes caritas Christi» («Любоў Хрыста да мігрантаў») — была апублікавана каля 5 гадоў таму. На думку сакратара Папскай рады пастырства эмігрантаў і падарожнікаў арцыбіскупа Агостыно Маркетто, неабходна больш шырокае бачанне дадзенай праблемы. 20 мая 2009 г. арцыбіскуп Агостыно Маркетто прыняў удзел у кангрэсе, прысвечаным тэме правоў чалавека і гандлю нявольнікамі. Кангрэс быў арганізаваны ў Рыме Таварыствам папы Яна XXIII. Арцыбіскуп Маркетто перакананы, што абвастрэнне міграцыйнай палітыкі і кантролю на дзяржаўных межах не можа цалкам ліквідаваць рабства. Больш за тое, гэта заключае ў сабе дадатковую пагрозу для ахвяраў гэтага «промыслу». Арцыбіскуп Маркетто паінфармаваў, што Апостальская Сталіца ўзніме гэтую праблему на Сусветным кангрэсе душпастырства мігрантаў, запланаваным на лістапад гг.