10 чэрвеня 2009 г. падчас агульнай аўдыенцыі ў Ватыкане, якая адбылася напярэдадні ўрачыстасці Божага Цела, Святы Айцец Бэнэдыкт XVI пажадаў прысутным маладым людзям, каб сакрамэнт Цела і Крыві Пана быў для іх штодзённай духоўнай ежай на шляху да святасці, хворых, каб падтрымліваў і ўзмацняў у выпрабаванні і цярпенні, а маладыя сужэнствы ўмацоўваў у любові.

«Гэты дзень нагадвае нам пра цуд Божай прысутнасці пад відам хлеба і віна ў Эўхарыстыі. Мы будзем асаблівым чынам ушаноўваць Пана падчас святой Імшы і працэсіі. Няхай удзел у гэтай літургіі абудзіць у нас веру, каб мы, прымаючы Цела і Кроў Хрыста, з кожным разам усё глыбей адчувалі Яго бясконцую любоў. Няхай Бог вас благаслаўляе», — адзначыў Пантыфік.

Ва ўрачыстасць найсвяцейшага Цела і Крыві Хрыста Святы Айцец узначаліць эўхарыстычную працэсію па вуліцах Рыма, якая распачнецца пасля святой Імшы ў 19.00 перад базылікай святога Яна на Латэране і накіруецца да базылікі Маці Божай Большай.