Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Інтэрв’ю з кусташам марыйнага санктуарыя ў Будславе
Інтэрв'ю
12.07.2009 15:52
1 ліпеня 2008 г., напярэдадні ўрачыстасці Маці Божай Будслаўскай, кусташ нацыянальнага санктуарыя ў Будславе а. Віктар Бурлака даў невялікае інтэрв’ю нашаму карэспандэнту.


— Сёлета адзначаецца 10-я гадавіна каранацыі абраза Маці Божай Будслаўскай. Якія набажэнствы плануецца правесці з гэтай нагоды?

— Традыцыйна самым галоўным момантам кожнай вялікай урачыстасці з’яўляецца святая Імша. Сёлета, у сувязі з 10-годдзем каранацыі абраза Маці Божай Будслаўскай, будзе прачытана спецыяльная малітва да Нябеснай Апякункі, падчас якой мы ўсе з даверам даручым Яе апецы саміх сябе, нашыя сем’і, парафіі, увесь Касцёл на Беларусі.

— Айцец Віктар, вядома, што ў санктуарыі Маці Божай Будслаўскай вядуцца рэстаўрацыйныя працы. Скажыце, калі ласка, на якім этапе яны знаходзяцца і чаго ўжо ўдалося дасягнуць за гэты год?

— Так, многае ўжо зроблена, але многае яшчэ наперадзе. Вядзецца паэтапная рэстаўрацыя фасадаў святыні, устаўлены новыя вокны. Трэба падкрэсліць, што гэта было магчыма дзякуючы ахвяраванням вернікаў з мінскіх парафій — архікатэдральнага касцёла Імя Найсвяцейшай Панны Марыі і парафіі Святога Яна Хрысціцеля ў Серабранцы. Варта адзначыць, што сёлета галоўны алтар устаноўлены з боку галоўнага фасаду, як гэта было 10 гадоў таму назад, калі адбывалася каранацыя абраза Маці Божай Будслаўскай.

— Ці чакаеце Вы прысутнасці нейкіх асаблівых гасцей на ўрачыстасці?

— 2 ліпеня святую Імшу будзе канцэлебраваць кардынал Казімір Свёнтэк, які ў 1998 годзе ўзначаліў цырымонію каранацыі будслаўскага абраза. Прыбудзе Мітрапаліт Мінска-Магілёўскі арцыбіскуп Тадэвуш Кандрусевіч. Плануецца, што ва ўрачыстасці таксама прыме ўдзел Апостальскі нунцый на Беларусі арцыбіскуп Марцін Відавіч. Традыцыйна ў гэтыя дні ў Будслаў прыбываюць усе біскупы Беларусі.

У гэтым годзе кардынал Казімір Свёнтэк будзе ўрачыста ўзнагароджаны граматай падзякі за тую вялікую справу, якую ён учыніў для гэтага санктуарыя Маці Божай, а таксама за пастырскую падтрымку на працягу ўсіх гадоў працы нашых братоў у Будславе.

 

Пры выкарыстанні матэрыялаў сайта спасылка на Catholic.By абавязкова.