Апостальская Сталіца ўрачыста прызнала супольнасць “Легіён Марыі” ў якасці міжнароднай асацыяцыі вернікаў з юрыдычным статусам, прадугледжаным кананічным правам. Адначасова быў пацверджаны статут гэтага рэлігійнага аб’яднання. Адпаведны дэкрэт перадаў прадстаўнікам асацыяцыі сакратар Папскай рады па справах свецкіх біскуп Ёзэф Клеменс, цырымонія адбылася 27 сакавіка ў Ватыкане.

“Легіён Марыі” узнік у 1921 г. у Дубліне (Ірландыя) па ініцыятыве невялікай групы вернікаў пад кіраўніцтвам Фрэнка Дафа, супрацоўніка Міністэрства фінансаў, а затым асабістага сакратара міністра абароны Ірланцыі. На працягу 93 гадоў існавання супольнасць распаўсюдзілася ва ўсім свеце, у тым ліку ў Беларусі. “Легіён Марыі”, адметнасць якога грунтуецца на глыбокай марыйнай духоўнасці і адданасці Духу Святому, прапануе вернікам устаць на шлях святасці і ўдзельнічаць у евангелізацыйнай місіі Касцёла праз служэнне самым патрабуючым і далёкім ад веры.

У Беларусі “Легіён Марыі” пачаў дзейнічаць з 1994 г., яго супольнасці ёсць у розных гарадах. Легіянеры Марыі праводзяць штотыднёвыя малітоўныя сустрэчы, наведваюць шпіталі, дамы састарэлых, турмы.

Біскуп Ёзэф Клеменс, звяртаючыся да прысутных на цырымоніі ўручэння дэкрэту членаў “Легіёна Марыі”, адзначыў, што Касцёл праз прызнанне гэтай супольнасці зноў указвае на каштоўны прыклад святасці яе заснавальнікаў. “Няхай яны будуць крыніцай натхнення на будучыню”, пажадаў іерарх і заклікаў членаў супольнасці ўважліва сузіраць мінулае, каб убачыць Божыя справы. “Так, сапраўды, Бог учыніў вялікія справы! Тым не менш, сёння Касцёл чакае ад “Легіёна Марыі” яшчэ большага, таму што патрэбы свету вялікія і шмат людзей яшчэ не ведаюць імя Хрыста ці забыліся яго”, - сказаў прадстаўнік Апостальскай Сталіцы.

Паводле беларускай рэдакцыі Ватыканскага радыё

(AG)