Біскуп з Ватыкана ахарактарызаваў мэту збору ахвяраванняў на карысць Папы

Дзяржава Ватыкан

24.06.2014 18:02

Дапамагаць Папу Францішку падтрымліваць іншых, — так арцыбіскуп Анджэла Бэчу, субстытут Апостальскай Сталіцы, ахарактарызаваў мэту збору ахвяраванняў, які штогадова праводзіцца ва ўсіх парафіях свету ва ўрачыстасць святых апосталаў Пятра і Паўла 29 чэрвеня. У інтэрв’ю агенцтву «SIR» высокі ватыканскі іерарх распавёў, што традыцыя збору ахвяраванняў на карысць Намесніка св. Пятра мае свае карані яшчэ з часоў ранняга Касцёла. «Гэта акт любові да Папы і Касцёла. Канешне, існуе шмат дабрачынных ініцыятываў, і мы павінны радавацца гэтаму. Але збор ахвяраванняў на карысць Намесніка св. Пятра вылучаецца тым, што з’яўляецца выразам клопату пра Папу і Касцёл ва усім свеце», — падкрэсліў арцыбіскуп Бэчу. Паводле іерарха, гэта традыцыя мае два фундаментальныя элементы: па-першае, яна падкрэслівае паўсюднасць Касцёла, бо ахвяраванні збіраюцца паўсюль — ад вялікіх архікатэдраў да маленькіх перыферыйных парафій, а па-другое — адзінства, таму што нягледзячы на колькасць сабраных грошай, важным з’яўляецца шчыры ўдзел у ініцыятыве. Арцыбіскуп Бэчу нагадаў пра асаблівы клопат Папы Францішка пра бедных, на патрэбы якіх вылучаецца значная частка ахвяраванняў, што паступаюць у Ватыкан. Субстытут Апостальскай Сталіцы пажадаў, каб збор ахвяраванняў ва ўрачыстасць святых апосталаў Пятра і Паўла, стаў магчымасцю выказаць сваю блізкасць папе Францішку з боку ўсіх вернікаў і каб ахвяраванне грошай было злучана з малітвай за яго. «Гэта будзе выказам той любові, аб якой Святы Айцец не стамляецца прасіць усіх, каго сустракае: ніхто не з’яўляецца настолькі бедным, каб не мець магчымасці падарыць яе», — сказаў арцыбіскуп Бэчу. Паводле Беларускай рэдакцыі Ватыканскага радыё, (AYU)