4 верасня 2014 г. у Ватыкане была ўрачыста адкрыта інтэрнэт-платформа “Scholas occurentes” – пэўнага кшталту адукацыйная сацыяльная сетка, мэта якой заключаецца ў тым, каб злучыць паміж сабой школы ўсяго свету і спрыяць выхаванню моладзі ў духу культуры сустрэчы і міру. Ініцыятыва была рэалізавана аднайменнай ватыканскай адукацыйнай структурай, якая ўзнікла па ініцыятыве Папы Францішка.

Пантыфік прыняў удзел у першым відэамосце, арганізаваным у рамках праекту, і з дапамогай інтэрнэту і відэакамеры паразмаўляў са школьнікамі Сальвадора, Паўднёвай Афрыкі, Турцыі, Ізраіля, Аўстраліі і Камеруна.

Папа заклікаў юнакоў і дзяўчат “марыць аб будучыні”, але не забываць аб “спадчыне культуры, мудрасці і рэлігій, перададзенай пажылымі людзьмі”, нагадаў пра важнасць таго, каб з самага маленства вучыцца культуры сустрэчы і будавання мастоў паміж людзьмі, тым больш што зараз, па яго словах, свет прабывае ў стане вайны.

Адзін з удзельнікаў дыскусіі задаў Пантыфіку пытанне пра лёс чалавецтва. Папа сказаў, што не мае “шклянога шару, як у вядзьмарак, каб прадказваць будучыню”, тым не менш выказаў перакананасць у тым, што будучыня залежыць ад “моладзі, якая мае крылы, каб лятаць, марыць, тварыць, і якая мае карані, каб атрымліваць ад пажылых людзей пазнанне”.

Паводле беларускай рэдакцыі Ватыканскага радыё

(AG)