З 19 красавіка па 24 чэрвеня 2015 г. у Турыне (Італія) будзе выстаўлена Турынская плашчаніца. Аб праграме будучай падзеі, цэнтральным пунктам якой будзе візіт у Турын Папы Францішка, паведаміў на прэс-канферэнцыі ў Ватыкане мясцовы арцыбіскуп Чэзарэ Назілья.

Выстаўленне святыні мае два аспекты: свет моладзі і пакут, паведаміў іерарх. Наведванне, як і ў папярэднія разы, будзе бясплатным, дзякуючы дапамозе дабрачынцаў, якія пакрылі кошты, звязаныя з падрыхтоўкай да падзеі.

Адметнасцю выстаўлення плашчаніцы з’яўляецца прыняцце хворых. У наступным годзе такім пілігрымам будзе нададзена асаблівая ўвага падчас набажэнстваў, розных ініцыятыў і ў месцах, прызначаных для іх прабывання. Два шпіталі каля турынскай катэдры будуць абсталяваны 70 месцамі на ўзор санктуарыя ў Лурдзе, з магчымасцю спажывання ежы па больш нізкіх коштах.

Арцыбіскуп Назілья заўважыў, што выстаўленне стане трэцім у гэтым стагоддзі: пасля 2000 і 2010 гадоў. Раней рэліквія выстаўлялася ў 1978, 1998, 1933 і 1900 гадах. Акрамя таго, у 1993 і 2013 гадах адбывалася яе «тэлевізійнае» выстаўленне. У 1998 годзе капліцу плашчаніцы наведаў Ян Павел ІІ, а ў 2010 годзе каля святыні маліўся Бэнэдыкт XVI. Арцыбіскуп Турына нагадаў, што з 1984 г. Турынская плашчаніца знаходзіцца ва ўласнасці Святога Пасаду.

Паводле беларускай рэдакцыі Ватыканскага радыё

(AG)