У Апостальскай Сталіцы абмяркуюць жыццё жанчын у сучасным свеце і праблему душпастырства ў гарадах |
Дзяржава Ватыкан
|
02.02.2015 15:43 |
Жыццю жанчын у сучасным свеце і праблеме душпастырства ў гарадах будуць прысвечаны пленарныя пасяджэнні Папскай рады па культуры і Папскай рады па справах свецкіх. Яны пройдуць амаль адначасова і завершацца 7 лютага аўдыенцыямі ў Святога Айца.
Штогадовая сустрэча членаў Папскай рады па культуры пачнецца 4 лютага і будзе прысвечана тэме «Жаночыя культуры: паміж роўнасцю і адметнасцю». Прыняць удзел у асамблеі запрошаны некаторыя жанчыны – эксперты ў сацыялогіі, паліталогіі, духоўнасці, мастацтве. Разам з членамі ватыканскага ведамства яны паразмаўляюць аб актуальнай сітуацыі жанчын у розных культурах, аб жаночай унікальнасці і роўнасці палоў, здольнасці даваць жыццё ў самым шырокім значэнні гэтага слова, аб каштоўнасці жаночага цела, камунікатыўных здольнасцях жанчын і іх ролі ў жыцці Касцёла.
5 лютага пачнецца пленарнае пасяджэнне Папскай рады па справах свецкіх. Яго ўдзельнікі будуць абмяркоўваць праблемы душпастырства ва ўрбаністычным кантэксце. Гэтая тэма з’яўляецца асабліва актуальнай у сувязі з ростам гарадскога насельніцтва, якое ў 2050 г. дасягне 70% насельніцтва планеты, нагадалі арганізатары падзеі. Сярод дакладчыкаў на асамблеі выступіць арцыбіскуп Манілы кардынал Луіс Антоніо Тагле, заснавальнікі італьянскіх «Супольнасці новых гарызонтаў» і «Супольнасці св. Эгідзія» К’яра Амірантэ і Андрэа Рыкардзі. Гаворка будзе ісці пра «прагу Бога ў гарадскіх пустынях», каштоўнасць гарадскіх перыферый і важнасць сацыяльнага навучання Касцёла для душпастырства ў мегаполісах.
Паводле беларускай рэдакцыі Ватыканскага радыё (AG)
|