Дзяржаўны Сакратар Яго Святасці Папы кардынал П’етро Паралін прыме ўдзел у Саміце Амерык – сустрэчы дзяржаўных лідараў краін амерыканскіх кантынентаў, якая пройдзе 10-11 красавіка ў Панаме. Раней Апостальская Сталіца ніколі не была прадстаўлена на гэтым мерапрыемстве на ўзроўні Дзяржсакратара.

Падобныя форумы праводзяцца кожныя два-тры гады па ініцыятыве Арганізацыі амерыканскіх дзяржаў з мэтай фарміравання агульнай стратэгіі ў вырашэнні праблем, якія стаяць перад краінамі рэгіёна. Панамскі саміт стане сёмым за ўсю гісторыю іх правядзення.

З прапановай скіраваць на Саміт спецыяльнага пасланніка звяртаўся да Святога Айца 5 верасня 2014 г. падчас аўдыенцыі ў Ватыкане Прэзідэнт Рэспублікі Панама Хуан Карлас Варэла. Папа Францішак вырашыў, што прадстаўляць Апостальскую Сталіцу павінен кардынал П'етро Паралін, які меў досвед дыпламатычнай працы ў Мексіцы і Венесуэле і добра знаёмы з праблемамі рэгіёна.

На сённяшні дзень свой удзел у Саміце Амерык пацвердзілі 24 кіраўнікі амерыканскіх дзяржаў і ўрадаў. Чакаецца, што ў форуме ўпершыню прыме ўдзел дэлегацыя з Кубы.

Паводле беларускай рэдакцыі Ватыканскага радыё

(AG)