30 чэрвеня ў Ватыкане падвялі вынікі другога тыражу папскай дабрачыннай латэрэі. На гэты раз галоўным прызам стаў аўтамабіль “Kia Soul”, якім карыстаўся Папа Францішак падчас свайго леташняга візіту ў Карэю. Аўтамабіль быў падораны Пантыфіку карэйскімі ўладамі.

Сярод іншых прызоў - два ровары і сярэбраныя статуі Панны Марыі і Святой Сям’і.

Розыгрыш квіткоў адбываўся выключна праз дзве ватыканскія ўстановы: аптэку і пошту. Усе сродкі, атрыманыя ад латарэі, будуць прызначаны на дабрачынную дзейнасць Папы.

За выкарыстанне грошай адказвае папскі элемазінарый арцыбіскуп Конрад Краеўскі, які ў апошні час, сярод іншага, устанавіў побач з плошчай св. Пятра душавыя для бяздомных і арганізаваў для іх пілігрымку да Турынскай плашчаніцы. Зараз рыхтуецца месца начлегу для гэтых людзей.

Паводле беларускай рэдакцыі Ватыканскага радыё

(AG)