15 верасня ў Ватыкане пачалася сустрэча для маладых кансэкраваных асобаў на тэму «Абудзіце свет! Евангелле, прароцтва, надзея».

Форум, які працягнецца да 19 верасня, праводзіцца па ініцыятыве Кангрэгацыі па справах Інстытутаў кансэкраванага жыцця і таварыстваў апостальскага жыцця. Сустрэча сабрала каля чатырох тысяч законнікаў і законніц з усяго свету, якія перажываюць перыяд разважання перад складаннем вечных манаскіх абяцанняў або склалі іх не больш за дзесяць гадоў таму.

Штодзённыя сустрэчы праходзяць у ватыканскай Зале Паўла VI. Іх мэта заключаецца ў паглыбленні ведаў маладых законнікаў аб фундаментальных элементах кансэкраванага жыцця праз біблійную, тэалагічна-харызматычную і эклезіялагічную прызму. Форум дае ўдзельнікам магчымасць для новых знаёмстваў і дзялення досведамі і чаканнямі.

Паводле беларускай рэдакцыі Ватыканскага радыё

(AG)