18 студзеня ў Ватыкане адбылася прэзентацыя Апостальскіх Кангрэсаў Міласэрнасці, якія пройдуць у рамках святкавання Юбілейнага Года.

На еўрапейскім узроўні форум адбудзецца ў Рыме з 31 сакавіка па 4 красавіка 2016 года, а на сусветным – на Філіпінах з 16 па 20 студзеня 2017 года.

У праграме рымскага форума прадугледжана малітоўнае чуванне на плошчы св. Пятра, якое пройдзе 2 красавіка з удзелам Пантыфіка, а таксама святая Імша ў Нядзелю Божай Міласэрнасці.

1 красавіка вернікам будзе прадстаўлена асаблівая магчымасць прыступіць да сакрамэнту пакаяння: у некалькіх вызначаных касцёлах Рыма святары будуць спавядаць на працягу ўсяго дня.

У Апостальскіх Кангрэсах прымуць удзел не толькі хрысціяне, але і вызнаўцы ісламу, якія падзеляцца сваім разуменнем Божай Міласэрнасці. Адной з тэм рымскага форума стане міграцыя.

«Зараз, перад вялікім выклікам мігрантаў і бежанцаў, існуе рызыка таго, што кожны схаваецца за сваімі межамі, што зноў будуць узведзены бар’еры і сцены. Жалезная завеса зноў існуе: іншым чынам, але існуе зноў. Гэта велізарны выклік: мы зноў знаходзімся перад хваляй неанацыяналізму ў Еўропе», — сказаў прысутны на прэзентацыі ў Ватыкане кардынал Крыстаф Шонбарн.

Арцыбіскуп Вены выказаў спадзяванне, што еўрапейскія біскупы прыйдуць да адзінага меркавання па гэтым пытанні.

Упершыню Апостальскі Кангрэс Міласэрнасці быў праведзены ў 2008 годзе ў рымскай базыліцы св. Яна на Латэране.

Ля вытокаў гэтай ініцыятывы стаяць чатыры кардыналы: польскі – Станіслаў Дзівіш, літоўскі – Аўдрыс Бачкіс, філіпінскі – Луіс Антоніо Тагле і французскі – Жан-Луі Таран.

Паводле беларускай рэдакцыі Ватыканскага радыё (MV)