«Ініцыятыва – сумесная. Сустрэча рыхтавалася ўжо даўно, пачынаючы з часу, калі прайшло ўсяго некалькі месяцаў пасля абрання Папы Францішка».

 

«Непасрэднай падрыхтоўкай займаліся, з каталіцкага боку, старшыня Папскай рады спрыяння хрысціянскаму адзінству кардынал Курт Кох, а з боку Рускай Праваслаўнай Царквы – старшыня Аддзела знешніх царкоўных сувязяў Маскоўскага Патрыярхату Мітрапаліт Валакаламскі Іларыён», – паведаміў айцец Іакінф Дэсцівэль OP, cупрацоўнік ватыканскага ведамства. 

Што датычыцца тэм сустрэчы, тут няма «фіксаванага парадку дня». Гэта не пратакольная дыпламатычная або палітычная сустрэча, а сустрэча пастыраў дзвюх хрысціянскіх супольнасцяў, якія будуць абмяркоўваць царкоўныя ўзаемаадносіны, праблемы паствы, выклікі, якія стаяць перад светам і цывілізацыяй, адзначыў айцец Дэсцівэль і дадаў, што прадмет сустрэчы не будзе тэалагічны, паколькі тэалагічны дыялог даўно і плённа развіваецца асобна ў рамках адмысловай камісіі. 

На думку супрацоўніка Папскай рады, верагодна, паўстане пытанне абароны пераследаваных хрысціян на Блізкім Усходзе, пытанне сям’і і абароны жыцця.

Прадстаўнік Ватыкана лічыць, што сустрэча, якая пройдзе 12 лютага 2016 г. у гаванскім аэрапорце, дапаможа збліжэнню і ўзаемаадносінам паміж католікамі і праваслаўнымі не толькі на постсавецкай прасторы, але і ў свеце.