Рыма-Каталіцкі Касцёл і Руская Праваслаўная Царква могуць стварыць сумесную камісію для вырашэння праблем, звязаных з грэка-католікамі.

Пра гэта ў інтэрв’ю РИА Новости паведаміў галоўны арганізатар сустрэчы Папы і Патрыярха з праваслаўнага боку — старшыня Аддзела знешніх царкоўных сувязяў Маскоўскага Патрыярхату Мітрапаліт Валакаламскі Іларыён:

«Ёсць ідэя стварыць такую камісію — каталіцкі бок прапаноўваў нам яе стварыць... Думаю, што мы, канешне, можам абмеркаваць гэтыя прапановы. Мы не супраць стварэння камісіі».

Аднак, паводле слоў Мітрапаліта, канкрэтныя параметры гэтай камісіі складана пакуль уявіць, асабліва ўлічваючы нядаўнюю рэзкую заяву кіраўніка ўкраінскіх грэка-католікаў.

«Тут узнікаюць пытанні: як будзе працаваць гэтая камісія, якім будзе яе механізм, і самае галоўнае — якіх вынікаў можна будзе ад яе чакаць?» — дадаў іерарх.

Паводле сайта «Cибирскай католической газеты» (IL)