Кожны год 8 сакавіка Святы Пасад збірае жанчын, якія ўмацавалі Касцёл праз сваю ініцыятыву, сілу волі і лідарскія якасці.

«Галасы веры» даюць магчымасць удзельніцам падзяліцца сваімі сапраўднымі гісторыямі адданасці, смеласці і радасці, а слухачам і гледачам даведацца, якія магчымасці і перамогі дае шчырае служэнне Богу.

На сайце Voicesoffaith.org можна паслухаць сведчанні жанчын, пачынаючы з першага мерапрыемства, якое адбылося ў 2014 годзе.

«Галасамі» 2016 года будуць жанчыны, якія змагаюцца за справядлівасць на ўсіх кантынентах: змагаюцца з сучасным нявольніцтвам, дапамагаюць бедным і бяздомным, навучаюць моладзь, будуюць жыццяздольныя мясцовыя супольнасці ў праблемных рэгіёнах, працуюць у СМІ.

Пра Каталіцкі Касцёл часам кажуць, што гэта пераважна жаночая супольнасць, якой кіруюць мужчыны. І ў гэтым ёсць частка праўды.

Аднак смелыя і ініцыятыўныя жанчыны-каталічкі паказваюць усім, што яны з Божай дапамогай здольныя дабівацца свайго, даваць прыклад змагання за дабро і гуляць у містычным Целе Хрыстовым актыўную, у тым ліку кіруючую, ролю.

Аляксандр Гелагаеў паводле англійскай рэдакцыі Ватыканскага радыё і Voicesoffaith.org