Дзяржаўны Сакратар Папы Францішка кардынал П’етро Паралін выказаў пажаданне, каб Юбілейны Год Міласэрнасці меў наступствы і для палітычнай сферы, у прыватнасці, каб паспрыяў спыненню вайны ў Сірыі. Аб гэтым іерарх сказаў падчас наведвання выставы «Antiquorum habet» аб гісторыі Святых Юбілеяў у Касцёле.

Выстава была адкрыта 15 сакавіка 2016 г. у Рыме. У мерапрыемстве прыняў удзел таксама старшыня Сената Італьянскай Рэспублікі П'етро Граса.

«Мы вельмі горача жадаем, каб Святы Год меў наступствы і на палітычным узроўні, у сэнсе спынення вайны ў Сірыі. Для людзей гэтая сітуацыя з’яўляецца нязноснай. Невымоўныя пакуты гэтага народа павінны рэхам адбіцца ў нашых сэрцах і сэрцах палітыкаў», — сказаў Дзяржаўны Сакратар.

Кардынал П'етро Паралін выказаў спадзяванне на добрыя вынікі мірных перамоў у Жэневе і станоўча ацаніў вывад расійскіх войскаў з Сірыі. «Пабачым, ці змогуць гэтыя апошнія дзеянні, выйсце Расіі, прывесці да прагрэсу ў перамовах і дасягненні палітычнага рашэння», — дадаў іерарх.

Бліжэйшы супрацоўнік Святога Айца нагадаў, што 18 сакавіка здзейсніць візіт у Македонію, падчас якога сустрэнецца з бежанцамі.

Выстава «Antiquorum habet» будзе працягвацца да 1 мая. Яна дае магчымасць наведвальнікам пазнаёміцца з гісторыяй Святых Юбілеяў, пачынаючы ад першага, які прайшоў у 1300 г., да нашых дзён. Тут прадстаўлены манускрыпты, старажытныя і сучасныя друкаваныя кнігі, часопісы і буклеты, фотаздымкі з архіву Сената Італьянскай Рэспублікі. Кардынал П'етро Паралін назваў выставу «знакам увагі» да Святога Года, які пажадаў абвясціць Папа Францішак.

Паводле беларускай рэдакцыі Ватыканскага радыё, (AYU)