«Страшнае забойства нявінных людзей у парку пакістанскага горада Лахор кінула цень гора і пакут на велікодныя ўрачыстасці», — адзначыў кіраўнік Прэс-службы Апостальскай Сталіцы а. Федэрыко Ламбардзі.

Смяротнік зладзіў ва ўсходнепакістанскім горадзе выбух каля ўваходу ў парк, паблізу дзіцячага сектара і білетных кас.

У выніку выбуху, па апошніх даных, загінула больш за 70 чалавек, з іх 23 дзіцяці. Больш за 300 чалавек атрымалі раненні, у тым ліку 56 дзяцей.

Яны шпіталізаваны ў розныя клінікі горада, дзе не хапае месцаў.

«Выбіраючы такое месца, ён разлічваў на максімальную колькасць ахвяр», — адзначылі ў мясцовай паліцыі.

«Чарговы раз баязлівая смяротная нянавісць бязбожна буяніць сярод найбольш уразлівых асобаў. Разам з Папам, які быў праінфармаваны аб гэтай падзеі, мы молімся за ахвяр, мы блізкія да параненых, пацярпелых сем’яў, іх вялікага болю, да хрысціянскай меншасці, чарговы раз пацярпелай ад фанатычнага гвалту, і да ўсяго церпячага пакістанскага народу.

Як ужо сказаў Святы Айцец, нягледзячы на такія страшныя праявы нянавісці, Укрыжаваны Хрыстус увесь час дае нам мужнасць і надзею, неабходныя для будаўніцтва шляхоў спачування, салідарнасці з тымі, хто пакутуе, дыялогу, справядлівасці, прымірэння і міру», — адзначыў кіраўнік Прэс-службы Святога Пасаду.

Два дні таму Папа Францішак, заклікаючы да малітвы за пацярпелых у тэракце, сказаў, што «гвалт і забойчая нянавісць вядуць выключна да болю і знішчэння».

Пантыфік чарговы раз нагадаў, што «павага і братэрства — гэта адзіны шлях для дасягнення міру».

Паводле беларускай рэдакцыі Ватыканскага радыё (MV)