31 сакавіка ў Рыме пачнецца Еўрапейскі апостальскі кангрэс Божай Міласэрнасці. Форум працягнецца да 4 красавіка. У ім прыме ўдзел Папа Францішак: 2 красавіка Пантыфік будзе прысутнічаць на малітоўным чуванні з нагоды чарговай гадавіны смерці св. Яна Паўла ІІ.

На наступны дзень, у Нядзелю Божай Міласэрнасці, Папа ўзначаліць Эўхарыстыю на галоўнай ватыканскай плошчы.

Кангрэс пачнецца святой Імшой у рымскім касцёле Сант-Андрэа-Дэла-Вале, якую ўзначаліць кардынал Агасціно Валіні, Папскі вікарый для Рымскай дыяцэзіі. Пасля яе духоўную канферэнцыю правядзе кардынал Крыстаф Шонборн, арцыбіскуп Венскі і старшыня Камітэту Сусветных кангрэсаў Божай Міласэрнасці. У рамках форума з дакладам аб хрысціянскай духоўнасці заснавальнікаў Еўрапейскага Саюза — Рабэра Шумана, Альчыда Дэ Гаспэры і Конрада Адэнаўэра — выступіць віцэ-пастулятар беатыфікацыйнага працэсу французскага палітыка айцец Ёзэф Ёст.

Сярод рэферэнтаў будзе таксама кардынал Вальтэр Каспер, старшыня на пенсіі Папскай рады спрыяння хрысціянскаму адзінству. Ён падзеліцца сваімі думкамі адносна міласэрнасці з тэалагічнага пункту гледжання. Старшыня Папскай рады па новай евангелізацыі арцыбіскуп Рыно Фізікела прачытае даклад аб ласцы і выкліках Года Міласэрнасці.

Сваімі сведчаннямі аб «абліччах міласэрнасці» падзеляцца асобы з розных краін Старога Кантынента: Іспаніі, Польшчы, Аўстрыі, Германіі, Літвы, Чэхіі, Румыніі.

Ідэя Кангрэсаў Божай Міласэрнасці нарадзілася пасля смерці св. Яна Паўла ІІ сярод яго паплечнікаў-кардыналаў: Станіслава Дзівіша, Аўдрыса Бачкіса, Луіса Антоніо Тагле і Жана-Луі Тарана. Форумы праходзяць на міжнародным, кантынентальным і нацыянальным узроўнях з 2008 г.

Паводле беларускай рэдакцыі Ватыканскага радыё, (AYU)