Міжнародная канферэнцыя, прысвечаная клопату пра людзей, пакутуючых ад хваробы Хансэна, або праказы, адбудзецца ў Рыме па ініцыятыве Папскай рады пастырства работнікаў сферы аховы здароўя.

Форум пройдзе 9-10 чэрвеня ў Патрыстычным інстытуце «Augustinianum». Яго прэзентацыя прайшла 7 чэрвеня ў Ватыкане.

У канферэнцыі прымуць удзел прадстаўнікі Святога Пасаду і вядомыя на міжнародным узроўні спецыялісты, якія будуць размаўляць пра эфектыўную дапамогу хворым і іх блізкім, спосабы інтэграцыі пракажоных у грамадства, праз прызму медыцыны, правоў чалавека і веры.

Гаворка пойдзе таксама пра ўклад Каталіцкага Касцёла і іншых рэлігійных супольнасцяў у справу клопату аб хворых. Прагучаць сведчанні прадстаўнікоў асацыяцый, няўрадавых арганізацый і саміх асобаў, якія пакутуюць ад праказы.

«Узгаданая хвароба застаецца актуальнай медыцынскай праблемай. Хоць сёння яна паддаецца эфектыўнаму лячэнню, асобы, якія яе перанеслі, лічацца "адметнымі" і нярэдка сустракаюцца з сацыяльным адчужэннем», — было адзначана падчас ватыканскай прэзентацыі.

Паводле даных Сусветнай арганізацыі аховы здароўя, кожны год у свеце выяўляецца каля 200 тыс. новых выпадкаў захворвання на праказу. Каля 9% з іх тычацца дзяцей.

Паводле беларускай рэдакцыі Ватыканскага радыё,

(MV)