Пасля Вялікадня з’явіцца новая папская адгартацыя

Святы Айцец

11.03.2010 13:14

Пасля Вялікадня з’явіцца папская адгартацыя пра Божае слова, якая падсумуе вынікі Сіноду Біскупаў 2008 года. Пра гэта заявіў генаральны сакратар Сіноду арцыбіскуп Нікола Этэравіч, адказваючы на пытанні журналістаў падчас прэзентацыі кнігі аб дыскусіі Айцоў Сіноду на тэму Святога Пісання. Арцыбіскуп Нікола Этэравіч падкрэсліў, што адгартацыя Бэнэдыкта XVI будзе адрасавана як Паўсюднаму Касцёлу, так і ўсім людзям добрай волі. «Пантыфік заахвоціць да чытання Божае Слова, каб адшукаць Езуса Хрыста — Дарогу, Праўду і Жыццё для кожнага», — адзначыў іерарх. Адгартацыя — спецыяльны зварот Папы да біскупаў, духавенства і ўсіх вернікаў, прысвечаны пэўнаму аспекту жыцця Касцёла. Як і энцыкліка, адгартацыя называецца па першых словах лацінскага тэксту, але, у адрозненне ад першай, у ёй звычайна закранаюцца больш вузкія пытанні. Большасць адгартацый з’яўляюцца пасля Сінодаў Біскупаў (сходаў біскупаў з розных рэгіёнаў свету, якія склікае Папа для вырашэння надзённых пытанняў дзейнасці Касцёла) і з’яўляюцца ў пэўным значэнні вынікам працы гэтых Сінодаў.