Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Папская рада па справах сям’і: Год Міласэрнасці павінен быць для сем’яў і Касцёла часам збліжэння
Рымская курыя
24.11.2015 15:51

Год Міласэрнасці павінен быць для сем’яў і Касцёла часам збліжэння, усталявання больш моцнага саюзу, сказаў старшыня Папскай рады па справах сям’і. На думку арцыбіскупа Вінчэнца Паліі, сёння шматлікія сем’і занадта ізаляваныя ад Касцёла, а касцёльныя супольнасці з’яўляюцца для іх занадта бюракратычнымі і клерыкальнымі.

Кіраўнік ватыканскай дыкастэрыі падкрэсліў, што невыпадкова Юбілей сем’яў стане адным з першых буйных мерапрыемстваў Года Міласэрнасці. Ён будзе праходзіць 27 снежня, у нядзелю Святой Сям’і. У Ватыкане сем’і сустрэнуцца спачатку ля святочных ясляў на плошчы св. Пятра, пад адкрытым небам, у холадзе, каб затым прайсці праз Святыя Дзверы і сабрацца разам ля алтара над магілай св. Пятра. Гэта павінна стаць сімвалічным пераходам ад часам суровых рэалій жыцця да супольнасці вакол алтара, патлумачыў арцыбіскуп Вінчэнца Палья.

Апрача сем’яў, свае юбілеі ў Ватыкане адзначаць розныя групы вернікаў. 3 красавіка там адбудзецца цэлебрацыя для членаў шматлікіх рухаў, асацыяцый, манаскіх супольнасцяў, звязаных з духоўнасцю, заснаванай на Божай міласэрнасці. Члены дабрачынных і валанцёрскіх аб’яднанняў запрашаюцца ў Ватыкан 4 верасня. Тыя, хто асаблівым чынам падзяляе марыйную духоўнасць, змогуць прыняць удзел у спецыяльнай цэлебрацыі 9 кастрычніка. Сустрэча для моладзі адбудзецца 24 красавіка. Юбілейныя сустрэчы для дыяканаў, святароў і катэхетаў пройдуць адпаведна 29 мая, 3 чэрвеня і 25 верасня. Хворыя і інваліды запрашаюцца ў Ватыкан 12 чэрвеня. 6 лістапада адбудзецца спецыяльная цэлебрацыя для вязняў.

Паводле беларускай рэдакцыі Ватыканскага радыё, (AYU)

 

Пры выкарыстанні матэрыялаў сайта спасылка на Catholic.By абавязкова.