12 кастрычніка ў Папскім Урбаніянскім універсітэце пройдзе прэзентацыя чацвёртага паслання, прысвечанага кансэкраванаму жыццю. Дакумент, які выйдзе ў Ватыканскім выдавецтве на чатырох мовах, называецца «Annunciate» («Абвяшчайце») і адрасаваны членам манаскіх супольнасцяў ва ўсім свеце.

Узначаліць прэзентацыю кардынал Жуан Брас дзі Авіс, прэфект Кангрэгацыі па справах Інстытутаў кансэкраванага жыцця і Таварыстваў апостальскага жыцця, якая і з’яўляецца аўтарам ліста.

У спецыяльным паведамленні дыкастэрыі гаворыцца, што «Annunciate» завяршае серыю дакументаў, у якіх гучаць разважанні над рэчаіснасцю манаскага паклікання і жыцця. Папярэднія тры называліся: «Rallegratevi» («Радуйцеся»), «Scrutate» («Вывучайце»), «Contemplate» («Сузірайце»). Іх агульным лейтматывам стала запрашэнне да разумення чаканняў, памкненняў і жаданняў сучаснага чалавека, патрэбаў яго сэрца, а таксама страхаў і прычын недаверу і абыякавасці.

Трэба нагадаць, што ў Касцёле нядаўна завяршыўся Год кансэкраванага жыцця, які доўжыўся з 30 лістапада 2014 г. да 2 лютага 2016 г. Святы Айцец Францішак прыняў рашэнне аб яго правядзенні з нагоды 50-годдзя абвяшчэння саборнага дэкрэта «Perfecta caritatis». Тады і з’явілася ініцыятыва выдання чатырох спецыяльных пасланняў, адрасаваных манахам і манахіням.

Ва ўсім свеце налічваецца каля 950 тыс. кансэкраваных асобаў — законных айцоў, братоў і сясцёр і тых, хто належыць да свецкіх інстытутаў і індывідуальных форм кансэкраванага жыцця.

Паводле беларускай рэдакцыі Ватыканскага радыё(VGr)