Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Казанне Апостальскага Нунцыя арцыбіскупа Габара Пінтэра падчас Велікапоснага чування моладзі ў Мінску

8 красавіка

Дарагая моладзь,
Цудоўна атрымоўваецца, што сёлетняе чуванне супадае са святкаваннем Дыяцэзіяльных Сусветных Дзён Моладзі. Такім чынам у нас ёсць магчымасць яшчэ глыбей перажываць адзінства з Паўсюдным Касцёлам. Дарэчы, гэта з’яўляецца адным з галоўных заданняў Апостальскага Нунцыя — спрыяць лучнасці лакальнага Касцёла з паўсюдным. Я перакананы, што вы ахвотна дапаможаце мне яго выканаць. Святы Айцец Францішак з гэтай нагоды напісаў пасланне пад тытулам «Вялікае ўчыніў мне Усемагутны». Выбіраючы дэвізам словы «Магніфікату» на час падрыхтоўкі да наступных Сусветных Дзён Моладзі ў Панаме, Папа дае нам як прыклад для наследвання Марыю, маладую дзяўчыну, якую выбраў Бог, жадаючы здзейсніць справу збаўлення ўсяго свету. У маім разважанні пастараюся быць верным паслом Святога Айца і перадаць дух гэтага паслання, засяроджваючы нашу ўвагу на некаторых асабліва важных момантах у жыцці маладога чалавека.

Перш за ўсё Папа заклікае нас быць людзьмі веры. Людзьмі, якія перажываюць сваё існаванне са свядомасцю прысутнасці Бога, Божай любові і жадання збаўлення кожнага з нас. Калі навучышся заўважаць прысутнасць Бога ў сваім жыцці, яно пераменіцца. Цябе больш не будуць палохаць уласныя страхі ці абмежаванні, недахопы ці слабасці іншых, бо Бог большы за ўсё гэта. Калі Бог дакранаецца да сэрца маладога чалавека, той становіцца здольным на вялікія справы.

Другі важны аспект, над якім Папа Францішак заклікае нас паразважаць — гэта тое, што быць маладымі не азначае быць адарванымі ад мінулага. Памяць пра мінулае дапамагае прыняць незвычайныя, вялікія справы, якія Бог падрыхтаваў для нас. Разважанне над тым, як Ён дзейнічаў у нашым жыцці і ў жыцці нашых папярэднікаў, дазваляе паглядзець на сябе, як на прылады Яго любові, як на Яго супрацоўнікаў у справе збаўлення свету і канкрэтнага чалавека. Таму, хто ўсведамляе моц Божай міласэрнасці і ўсемагутнасці, значна лягчэй прыняць вялікую адказнасць і згадзіцца на вялікія справы. Каб не баяцца — помні пра тое, што Бог мацнейшы за твой страх і ў мінулым ужо не раз гэта паказаў.

Папа папярэджвае, што не кожны ўспамін з’яўляецца добрым, не кожны вопыт вядзе да паўнаты жыцця і можа дапамагчы надаць сэнс нашаму існаванню. Таму, дарагая моладзь, перажывайце вашае жыццё свядома і адказна, як вялікі дар, за які аднойчы прыйдзецца даць адказ. Адкідайце спакусу жыць адным імгненнем у нерэальным свеце, не гледзячы ўперад. Будзьце пратаганістамі вашай гісторыі, вырашайце самі вашую будучыню!

Пра Марыю кажуць, што яна «захоўвала ўсе гэтыя справы, разважаючы ў сэрцы сваім». Гэтая простая дзяўчына з Назарэта вучыць нас, як развіваць духоўную памяць, як, злучаючы разам асобныя здарэнні нашага жыцця, можна скласці адну мазаіку, хоць і ўтвораную са шматлікіх кавалкаў. Святы Айцец дае некалькі канкрэтных парадаў:

«У канцы кожнага дня можам на хвіліну спыніцца і ўспомніць, што было добра і што пайшло не так. Перад Богам і намі самімі можам выразіць нашыя пачуцці падзякі, пакаяння і даверу. Калі хочаце, можаце нават запісаць іх у сшытку, у свайго роду духоўным дзённіку. Гэта аначае — маліцца ў жыцці, жыццём і пра жыццё. І, безумоўна, гэта дапаможа вам лепш зразумець вялікія рэчы, якія Пан робіць для кожнага з вас. Як казаў святы Аўгустын, «Бога мы можам знайсці на шырокіх прасторах нашай памяці» (cfr. Confessioni, Libro X, 8, 12).

Трэцяя справа, на якую жадаю звярнуць вашу ўвагу, — гэта асабістая вера Марыі. Гэтая вера сцісла звязана з традыцыяй і верай яе народа. Чытаючы Магніфікат Маці Божай, заўважаем, як добра Марыя ведае Святое Пісанне. Кожны яго радок мае аналаг у Старым Запавеце. Маладая Маці Езуса добра ведала малітвы свайго народа, так званую народную пабожнасць. Такім чынам бачым, як Марыя, сабраўшы духоўную спадчыну свайго народа, спявае абсалютна новы, уласны спеў, які, аднак, у той жа час з’яўляецца спевам усяго Касцёла. І да сёння ўвесь Касцёл спявае яго разам з ёй.

Дазвольце яшчэ раз зацытаваць папу Францішка: «Для таго, каб вы, маладыя, маглі праспяваць свой уласны Магніфікат і зрабіць з вашага жыцця падарунак для ўсяго чалавецтва, фундаментальным з’яўляецца наладзіць сувязь з гістарычнай традыцыяй і малітвамі тых, хто быў да вас. Для гэтага важна добра ведаць Біблію, слова Божае, каб чытаць яго кожны дзень, параўноўваць з вашым жыццём, глядзець на штодзённыя падзеі ў святле таго, што вам кажа Пан у Святым Пісанні. У малітве і малітоўным чытанні Бібліі Езус будзе саграваць вашыя сэрцы, асвячаць вашыя крокі нават у самыя цёмныя гадзіны вашага існавання.
(пар. Лк 24, 13-35)».

Дарагая моладзь, Марыя — найлепшая Маці і прыклад дасканаласці, няхай заступаецца за кожнага з нас і дапамагае нам спяваць пра вялікія справы, якія Пан здзяйсняе ў нас і праз нас.

Адноўлена 10.04.2017 10:57
 

Пры выкарыстанні матэрыялаў сайта спасылка на Catholic.By абавязкова.

Гаміліі

05.07 09:13Гамілія Мітрапаліта Кандрусевіча падчас св. Імшы ў Тракелях
01.07 11:55Гамілія Мітрапаліта Кандрусевіча падчас св. Імшы ў Будславе
26.06 11:53Гамілія Мітрапаліта Кандрусевіча падчас св. Імшы на распачацце пілігрымкі з Мінска ў Будслаў
21.06 11:59Гамілія Мітрапаліта Кандрусевіча на Імшы для ўдзельнікаў Парафіяды Гродзенскай дыяцэзіі
15.06 12:02Гамілія Мітрапаліта Кандрусевіча да 25-годдзя адраджэння парафіі ў Слуцку
04.06 15:47Гамілія Мітрапаліта Кандрусевіча ва ўрачыстасць Спаслання Духа Святога
27.05 09:06Гамілія Мітрапаліта Кандрусевіча на св. Імшы перад працэсіяй Божага Цела ў Мінску
21.05 19:31Гамілія Мітрапаліта Кандрусевіча падчас св. Імшы з нагоды сярэбранага юбілею манаскіх абяцанняў біскупа Аляксандра Яшэўскага SDB
21.05 12:00Гамілія Мітрапаліта Кандрусевіча падчас св. Імшы з удзелам дзяцей да Першай Камуніі ў мінскай архікатэдры
20.05 14:19Гамілія біскупа Антонія Дзям’янкі падчас св. Імшы з нагоды 360-й гадавіны пакутніцкай смерці св. Андрэя Баболі