13 сакавіка 2015 г., Мінск

Шаноўны спадар Прэм’ер-міністр, шаноўны спадар Міністр замежных спрау, шаноўная спадарыня намеснік Міністра замежных спраў, прадстаўнікі дзяржаўнай улады, Высокапраасвяшчэнны Уладыка Павел, прадстаўнікі дыпламатычнага корпусу, біскупы Каталіцкага Касцёла і прадстаўнікі іншых канфесій і веравызнанняў, дарагія святары, законнікі і законніцы, шаноўнае спадарства,

я глыбока ўдзячны ўсім вам за тое, што вы прынялі запрашэнне Апостальскай Нунцыятуры ў Рэспубліцы Беларусь узяць удзел у гэтай радаснай падзеі. Сёння мы адзначаем другую гадавіну абрання Рымскім Пантыфікам Яго Святасці Папы Францішка. Ён як быццам знаходзіцца цяпер сярод нас дзякуючы прысутнасці свайго Дзяржаўнага Сакратара Яго Эмінэнцыі кардынала П’етро Параліна, які з афіцыйным візітам наведвае Рэспубліку Беларусь. Ваша Эмінэнцыя, словы, з якімі Вы звернецеся, гучаць для нас як словы самога Папы.

Гадзіну таму Вы асвяцілі вуглавы камень новага будынка Апостальскай Нунцыятуры — той самай Нунцыятуры, якая імкнецца данесці таксама ў гэтую краіну агульнапрызнаны маральны аўтарытэт Папства і Папы Францішка ў прыватнасці. Папа просіць нас быць увасабленнем нязмоўкнага закліку да міру ва ўсім свеце. Мэта нашых намаганняў таксама ў тым, каб спрыяць поўнаму прызнанню ўнёску Рэспублікі Беларусь з яе гісторыяй і культурай. Гэта ўнёсак, на які яна мае поўнае права.

Для дасягнення гэтай мэты неабходна весці дыялог з іншымі народамі і культурамі, каб кожны чалавек мог узбагаціцца і атрымаць імпульс, што скіруе ягоныя крокі да міру, да адстойвання штораз большай справядлівасці і свабоды, а таксама да безумоўнай пашаны да годнасці ўсіх партнёраў у гэтым працэсе.

У гэтым дыялогу дзеля міру павінны ўдзельнічаць усе веравызнанні, таму што там, дзе ствараюцца падзелы, наносіцца абраза годнасці Бога, якога ўшаноўваюць усе рэлігіі. Такія намаганні асаблівым чынам неабходныя паслядоўнікам Езуса Хрыста. Падзеі ў блізкай і дарагой нам Украіне зрабілі гэтую агульную мэту пільнай патрэбай.

Каталіцкі Касцёл у Беларусі свядома і ў поўнай меры спрыяе гэтаму дыялогу дзеля міру. Касцёл прысутнічае ў гэтым рэгіёне на працягу многіх стагоддзяў з поўным правам лічыцца неад’емнай часткай мясцовага грамадства. Ён спрычыніўся і хоча надалей спрыяць шчасцю кожнага беларуса паасобку і ўсяго беларускага народа ў цэлым.

Гэты ўнёсак з’яўляецца часткай нацыянальнай спадчыны Беларусі з усімі асаблівасцямі яе гістарычнага шляху, да якой належаць і невымоўныя пакуты, падзеленыя католікамі з праваслаўнымі братамі і сёстрамі, а таксама з вернікамі іншых веравызнанняў, перанесеныя з пакорай і маўчаннем, уласцівымі беларускай натуры.

Ваша Эмінэнцыя, сардэчна вітаю Вас на гэтай зямлі сведкаў Хрыстовых пакутаў. Дзякуй Вам за тое, што Вы згадзіліся быць пілігрымам любові на гэтай зямлі, прасякнутай крывёю на працягу стагоддзяў, але якая прагне паўнаты супакою, што бярэ свой пачатак ва ўшанаванні годнасці кожнага чалавека і ў мірнай будучыні.

Шчыра жадаем поспехаў у выкананні Вашай місіі і просім перадаць Яго Святасці Папу Францішку нашу падзяку і запэўненне ў гатоўнасці супрацоўніцтва, а таксама абяцанне маліцца за яго і за добры плён ягонага служэння.