К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
і на векі вечныя. Амэн. Аллелюя.

ГІМН
О, жыццядайны Творца зор,
Святло жыцця і наш узор,
О, Адкупіцель ўсёй зямлі,
Малітвы нашыя прымі.

Ты спачуваў, што згіне век
І смерць спазнае чалавек.
Знямоглы свет збаўляеш Ты,
Нас апраўдаеш назаўжды.

Хіліўся свет ў вячэрні час,
Ты як жаніх прыйшоў да нас
З улоння Дзевы Ўсесвятой,
Марыі, Маці дарагой.

Ўвесь свет, калені ты схілі
Прад моцай Божай і малі.
Зямля і неба хай пяюць,
Прарочаць і пашану шлюць.

Цябе, Святога, з вераю
У дні мы просім шэрыя,
Суддзя народаў, збаў жа нас
Ад зброі д’ябла ў страшны час.

Табе, наш Хрыстэ, добры Пан,
Айцец Нябесны, Валадар
І Суцяшыцель Дух Святы,
Хвала хай будзе назаўжды. Амэн.

1 ант. Абвяшчайце народам і кажыце: * Вось прыйдзе Бог, наш Збаўца.

Да Цябе, Пане, усклікаю, паспяшайся да мяне, *
пачуй мой голас, калі Цябе клічу.
Няхай мая малітва ўзыдзе да Цябе, нібы кадзіла, *
а ўзнясенне рук маіх – нібы вячэрняя ахвяра.
Пастаў, Пане, варту на вуснах маіх *
і захавай браму маіх вуснаў.
Не дай схіліцца сэрцу майму да злога слова, *
да здзяйснення нягодных учынкаў,
каб з людзьмі, якія чыняць беззаконне, *
я ніколі не еў іх прысмакаў.
Няхай справядлівы ў міласэрнасці *
ўдарае мяне і дакарае,
аднак алей грэшніка †
няхай не намашчае маёй галавы, *
бо заўсёды мая малітва скіравана супраць іх зла.
Іх суддзі патрапілі ў моц Божую *
і пачулі, якія лагодныя былі мае словы.
Як разараная і рассечаная зямля, *
так будуць раскіданы іх косткі над пашчай адхлані.
Да Цябе, Пане, звернуты вочы мае, *
у Табе шукаю прытулку, не адкінь душы маёй.
Захавай мяне ад пастак, пастаўленых на мяне, *
і ад сíла тых, хто чыніць зло.

Ант. Абвяшчайце народам і кажыце: * Вось прыйдзе Бог, наш Збаўца.

2 ант. Вось прыйдзе Пан і ўсе Яго святыя з Ім, * і будзе ў дзень гэты вялікае святло, / аллелюя.

Гучна ўсклікаю да Пана, *
голасна Пана прашу.
Выліваю перад Яго абліччам сваю жальбу *
і расказваю Яму пра сваю нядолю.
Калі знемагае дух мой ува мне, *
Ты ведаеш сцежкі мае.
На шляху, якім хаджу, *
тайком паставілі пастку на мяне.
Гляджу ўправа і бачу: *
ніхто не зважае на мяне.
Няма для мяне прытулку, *
ніхто не клапоціцца пра маю душу.
Я ўсклікаў да Цябе, Пане, †
я казаў: «Ты — мая абарона, *
мая доля ў краіне жывых.
Прыслухайся да майго ўсклікання, *
бо я вельмі прыніжаны.
Вызвалі мяне ад ганіцеляў маіх, *
бо яны мацнейшыя за мяне.
Выведзі з няволі душу маю, *
каб я дзякаваў імені Твайму.
Акружаць справядлівыя мяне, *
калі ўчыніш мне дабро».

Ант. Вось прыйдзе Пан і ўсе Яго святыя з Ім, * і будзе ў дзень гэты вялікае святло, / аллелюя.


3 ант. Прыйдзе Пан з вялікаю моцаю, * і ўбачыць Яго кожнае стварэнне.

Езус Хрыстус, будучы ў постаці Бога, *
не скарыстаў з таго, каб быць нароўні з Богам,
але выракся самога сябе, прыняўшы постаць слугі, †
прыпадобніўшыся да людзей; *
і з выгляду стаўшы як чалавек,
прынізіў сябе, †
будучы паслухмяным ажно да смерці, *
смерці крыжовай.
Таму Бог узвысіў Яго *
і даў Яму імя па-над усялякае імя,
каб на імя Езуса схілілася кожнае калена *
стварэнняў нябесных, зямных і падземных,
і каб кожны язык вызнаваў: †
«Панам ёсць Езус Хрыстус», *
дзеля хвалы Бога Айца.

Ант. Прыйдзе Пан з вялікаю моцаю, * і ўбачыць Яго кожнае стварэнне.

КАРОТКАЕ ЧЫТАННЕ

КАРОТКІ РЭСПАНСОРЫЙ

К. Пакажы нам, Пане, * сваю міласэрнасць. Н. Пакажы. К. І збаўленне сваё дай нам. Н. Сваю. К. Хвала Айцу. Н. Пакажы.

Ант. да песні Марыі. Чувайце, бо не ведаеце, * у які дзень Пан ваш прыйдзе.

Велічае душа мая Пана, *
і ўзрадаваўся дух мой у Богу, маім Збаўцу,
бо глянуў Бог на пакору сваёй слугі. *
I цяпер благаслаўляць мяне будуць усе пакаленні.
Бо вялікае ўчыніў мне Усемагутны, *
а імя Яго святое.
І міласэрнасць Яго з пакалення ў пакаленне *
над тымі, хто Яго баіцца.
Паказаў моц сваёй правіцы, *
рассеяў тых, хто пыхлівы сэрцам.
Скінуў магутных з трона *
і ўзвысіў пакорных.
Дабром галодных насыціў, *
а багатых ні з чым адправіў.
Прыняў свайго слугу Ізраэля, *
памятаючы пра сваю міласэрнасць,
як абяцаў бацькам нашым — *
Абрагаму і яго патомству навекі.

Ант. Чувайце, бо не ведаеце, * у які дзень Пан ваш прыйдзе.

ПРОСЬБЫ
Хрыста, радасць і вяселле ўсіх, хто Яго чакае, клічам:
Прыйдзі, Пане, і не спазняйся.
З радасцю чакаем Твайго прыйсця,
– прыйдзі, Пане Езу.
Ты існуеш перад вякамі,
– прыйдзі збавіць нас у гэтым веку.
Ты стварыў свет і ўсё, што яго насяляе,
– прыйдзі адкупіць справу сваіх рук.
Ты не пагардзіў нашай смяротнай натурай,
– прыйдзі вырваць нас з улады смерці.
Ты прыйшоў, каб мы мелі паўнату жыцця,
– прыйдзі і дай нам сваё вечнае жыццё.
Ты пажадаў з’яднаць усіх людзей у сваім валадарстве,
– прыйдзі сабраць тых, хто спадзяецца ўбачыць Тваё аблічча.

Ойча наш.