Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
У Каталіцкім Касцёле распачнецца Год кансэкраванага жыцця
Анонсы
22.11.2014 17:47

У першую нядзелю Адвэнту, 30 лістапада, згодна з рашэннем Папы Францішка, у Паўсюдным Касцёле распачнецца Год кансэкраванага жыцця. Ён будзе працягвацца з 30 лістапада 2014 г. да 2 лютага 2016 г.


У Ватыкане адкрыццю Года кансэкраванага жыцця будзе папярэднічаць малітоўнае чуванне ў базыліцы св. Пятра 29 лістапада.

У Беларусі адкрыццё Года кансэкраванага жыцця адбудзецца 27 лістапада ў мінскім архікатэдральным касцёле Імя Найсвяцейшай Панны Марыі:

  • у 11.00 пройдзе адарацыя Найсвяцейшага Сакрамэнту
  • у 12.00 адбудзецца святая Імша, якую ўзначаліць Апостальскі Нунцый у Беларусі арцыбіскуп Клаўдыё Гуджэроцці.

Пасля Імшы з канферэнцыяй да прысутных звернецца Першы сакратар Апостальскай Нунцыятуры ў Беларусі монс. Філіппо Чампанэллі.

У межах Года кансэкраванага жыцця пройдзе шмат сустрэч і іншых падзей, прысвечаных кансэкраванаму жыццю. Падрабязная праграма будзе пададзена.

Святы Айцец Францішак вырашыў, што 2015 год будзе Годам кансэкраванага жыцця з нагоды 50-годдзя абвяшчэння саборнага дэкрэта «Perfecta caritatis» аб аднаўленні законнага жыцця.

Год кансэкраванага жыцця будзе праходзіць пад дэвізам: «Узрадаваўся дух мой». Гэты год завершыцца святой Імшой, якую будзе цэлебраваць Папа ў Ватыкане 2 лютага 2016 г.

Ва ўсім свеце налічваецца каля 950 тысяч кансэкраваных асобаў — законных айцоў, братоў і сясцёр і тых, хто належыць да свецкіх інстытутаў і індывідуальных форм кансэкраванага жыцця. Варта адзначыць, што іх колькасць больш чым у два разы перавышае колькасць святароў, якіх у свеце каля 410 тысяч.

На працягу Года кансэкраванага жыцця тыя, хто прысвяціў сябе выключнаму служэнню Пану, жадаюць нанова ўвайсці ў глыбокае перажыванне свайго паклікання. Заахвочваем усіх ўключыцца ў малітву за тых, хто рэалізуе сваё пакліканне з законах, свецкіх інстытутах або ў індывідуальных формах кансэкраванага жыцця. Няхай не будзе недахопу ў малітве аб новых і святых пакліканнях да служэння Богу і людзям у супольнасці Касцёла.

(JM)

 

Пры выкарыстанні матэрыялаў сайта спасылка на Catholic.By абавязкова.