6 мая 2012 г. 26 швейцарскіх гвардзейцаў склалі ўрачыстую прысягу, паабяцаўшы «верна, аддана і сумленна служыць Пантыфіку, а таксама быць гатовымі аддаць сваё жыццё дзеля яго абароны».

З раніцы швейцарцы прынялі ўдзел у святой Імшы ў базыліцы святога Пятра. Дзяржсакратар Яго Святасці кардынал Тарчызіо Бэртонэ, які ўзначаліў літургію, адзначыў, што Швейцарская гвардыя асаблівым чынам заклікана да сведчання Хрыста, як на службе, так і ў прыватным жыцці.

Штогод прысяга швейцарскіх гвардзейцаў праходзіць 6 мая. Менавіта ў гэты дзень у 1527 г. адбылася бітва гвардзейцаў з 20-тысячнай арміяй Імператара Карла V падчас славутай аблогі Рыма. Падчас абароны Папы загінулі 142 са 189 гвардзейцаў. Гэта была самая вялікая трагедыя ў гісторыі Швейцарскай гвардыі.

Датай заснавання Папскай гвардыі можна лічыць 22 студзеня 1506 г., калі 150 гвардзейцаў пад камандаваннем капітана Каспара фон Зіленэна прыбыла ў Рым па запрашэнні Папы Юлія ІІ. Папская гвардыя выконвае ганаровы абавязак аховы Папы і Апостальскага Палаца, а таксама межаў дзяржавы Ватыкан. З нядаўняга часу яе члены суправаджаюць Святога Айца ў замежных падарожжах.